पुनःस्थापना होइन निर्वाचन मै जाने हो
स्वतन्त्र ब्यक्ति पनि प्रधानमन्त्री बन्न सक्छन्
काठमाडौ, पुस १६ - प्रधानमन्त्री बाबुराम भट्टराईले कांग्रेस यथास्थितिवादी शक्ति भएको दावी गर्दै 'अग्रगामी पार्टी वा व्यक्ति' लाई मात्र चुनावी सरकार सुम्पने जिकीर गरेका छन् । चुनाव गराउनु नै आफ्नो एक मात्र अभियान भएको पनि उनले बताएका छन् । त्यसका लागि ढिलोमा जेठ पहिलो साता निर्वाचन हुने ग प्याकेज सहमति भए सरकार छाड्ने जनाएका छन् ।
'कांग्रेसका कारण संविधानसभा बिघटन भएको हो । उसले सरकार लिए कुनै पनि हालतमा निर्वाचन गराउँदैन' निकटस्थ केहीलाई प्रधानमन्त्रीले आइतबार व्यक्त गरेको धरणा उद्धृत गर्दै स्रोतले भन्यो, 'मेरो एक मात्र मिसन निर्वाचन हो । अग्रगामी शक्तिले मात्र निर्वाचन गराउन सक्ने भएकाले उसैलाई मात्र सरकार सुम्पन तयार छु ।'
सत्तारुढ 'संघीय लोकतान्त्रिक गणतान्त्रिक गठबन्धन' ले पुस २५ भित्र प्याकेज सहमति नभए संविधानसभा पुनःस्थापनाको मुद्दा उठाउने निर्णय गरे पनि भट्टराईले भने आफू निर्वाचनकै पक्षमा भएको समेत बताएका छन् । 'म निर्वाचनकै पक्षमा हो । मैले संविधानसभा पुनःस्थापना गरेर हुदैन भन्दै आएको छु' उनको भनाइ थियो, 'हाम्रो जोड निर्वाचनमै हो ।' एमाओवादी अध्यक्ष पुष्पकमल दाहालले भने पुर्नस्थापना पनि बिकल्प भएको बताउदै आएका छन् ।
अध्यक्ष दाहाल र आफूबीच कुनै बिवाद नभएको दाबी भट्टराईले कांग्रेसलाई नेतृत्व दिन नसकिनेमा दुबै नेताबीच समान धारणा रहेको बताए । 'सरकार सुम्पने बिषयमा हामी बीच फरक धारणा छैन । अध्यक्ष सहमतिका लागि लचिलो र म बाधक हो भन्ने प्रचार गरिदैछ' उनले भने, 'यो हाम्रो पार्टीभित्र बिवाद ल्याउने प्रयास हो ।' दाहाल निकट नेताहरुले भट्टराईको अडानका कारण सहमति हुन नसकेको वताउँदै आएका छन् ।
अनौपचारिक केही बिषयमा दलहरु सहमति नजिक पुगेको भए पनि सरकारको बिषय 'ज्यूका त्यू' रहेकाले सहमति ननिस्एिको भट्टराईको भनाइ छ । कांग्रेस सभापति सुशील कोइरालाको नेतृत्वमा सरकार बन्ने संभावना क्षीण हुदै गएकाले राजनीतिक दलको सक्रियतामा स्वतन्त्र ब्यक्तिलाई प्रधानमन्त्रीको रुपमा अघि सारेर भए पनि निर्वाचन गराउनु पर्नेमा समेत उले जोड दिएको स्राेतले जनायो ।
कांग्रेसले सरकारको नेतृत्व लिए निर्वाचन नगराउने र प्राप्त उपलब्धी पनि संस्थागत नहुने भएकाले उसको सरकार स्वीकार्न नसकिने भट्टराईको बुझाई छ । 'हाम्रो विस्तारित बैठकले कांग्रेसका कारण संविधानसभा बिघटन भएको निश्कर्ष निकालेको थियो' उनले आरोप लगाए, 'उसले सरकारको नेतृत्व लिए निर्वाचन गराउदैन, सरकार मात्र टिकाउने काम गर्छ ।'
यसबीचमा भट्टराईले नागरिक समाजका नेता देबन्द्रराज पाण्डेलगायतसंग पनि छलफल गरेका छन् । आफ्नो कारणले निर्वाचन नभएको भनाइप्रति आक्रोश ब्यक्त गर्दै भट्टराईले राष्ट्रपतिले निर्वाचन प्रक्रियालगायत बिषयका अध्यादेश रोकेदेखि नै अप्ठ्यारो पर्दै आएको बताए । 'सरकारले निर्वाचन गराउन राष्ट्रपति समक्ष पठाएका अध्यादेश रोकेपछि म कस बाधक भए ?' उनी भन्छन्, 'अहिले आएर मलाई पो सबै प्रक्रियाको बाधक भनिंदैछ ।'
प्रकाशित मिति: २०६९ पुस १६ १२:०१
