दाहालले वैद्यलाई खर्च दिने !

काठमाडौ, श्रावण २६ - कुरो केही दिन अघिको हो, एमाओवादी अध्यक्ष पुष्पकमल दाहाल र नेकपा-माओवादी अध्यक्ष मोहन वैद्यबीच लाजिम्पाटमा भेटवार्ता भयो । प्रसंग थियो, पार्टी फुटे पनि आपसमा नलड्ने समझदारी गर्ने । कुरा चल्दै गर्दा वैद्यले दाहाललाई सोधे, 'विश्वासजी (प्रचण्डको पुरानो नाम) पार्टी कसरी चल्दैछ ?' औपचारिक रूपमा पार्टी विभाजनपछिको कुरा थियो त्यो । अर्काको मनोविज्ञान बुझ्न खप्पिस दाहाल मुसुक्क हाँसे । 'हाम्रो पार्टी त
राम्रै चलेको छ । तपाईहरू गएपछि अभाव खट्किएको भए पनि अरू खास समस्या छैन ।' वैद्य एकक्षण चुप बसे । फेरि दाहालले सोधे, 'अँ, साँच्चै किरण (वैद्य) जी तपाईको पार्टी कसरी चलिरहेको छ ?' वैद्यले सिधा जवाफ दिए, 'नयाँ पार्टी हो, धेरै कुरा मिलाउनै बाँकी छ । राम्रै चल्दैछ ।' वैद्यले यति भनेपछि केही सम्झेझै गरी प्रचण्डले हाँस्दै भने, 'नयाँ पार्टी चलाउन गाह्रै हुन्छ । पार्टी चलाउन खर्चबर्चको कस्तो व्यवस्था छ ? यदि पार्टी चलाउन अप्ठ्यारै परेको भए अप्ठ्यारो नमानी भन्नुहोला । पार्टी अलग भए पनि भावना त मिल्छ नि ।' वैद्यले 'हाल त्यस्तो कुनै समस्या नपरेको' जानकारी दिए । त्यसपछि दुबैजना मुस्कुराए ।      - जंगा